Erriberako Futbol Eskolak hogeitabigarren urtez antolatu duen udako futbol kanpusaren lehenbiziko txanda bukatzeko igandean Lesakako Kultur Etxean egindako ekitaldian 16 urtez Beti Gazte elkarteko presidente izandako Salvador Yanci gogoratu zuten. Izan ere, kanpuseko zuzendari den Rodriguezek aipatu zuenez, «Salvador Yancik ate guztiak ireki zizkigun kanpusa Lesakan egin ahal izateko, erraztasun guztiak eman zizkigun Beti Gaztek eta Yancik berak bultzatu zuen egitasmoa».
Marisol Irigoien alargunari lore-xorta bat eskaini zioten eta horretaz gain, Mikel Galardik Aurreskua dantzatu zien Yanciren alargunari eta familiari. Erriberako Futbol Eskolako eta kanpuseko ordezkari eta monitoreekin batera, gaur egun Beti Gazteko presidente den Jose Luis Sunsundegi eta Koldo Erkizia udal zinegotzia izan ziren ekitaldi hunkigarrian.