Emakumeen aurkako indarkeria kasuak saihesteko kontzientziazio kanpaina egiteko eta horietakoren bat gertatu balitz salatzeko eta informazio zuzena eskaintzeko lila puntua jarriko du bigarren urtez Bortzirietako Gizarte Zerbitzuen Mankomunitateak, Berdintasun Alorraren bidez, Lesakako Sanferminetako asteburuan, ortziralean eta larunbatean.
Berrikuntza moduan, droga eta sexualitateari buruzko informazioa ere emanen dute sanferminetako stand-ean. Mankomunitatearen asmoa, ortziralean drogen azterketarako furgoneta bat jartzea da, eta drogen arriskuen inguruko informazioa ematea. Sexualitateari dagokionez, babesik gabeko sexu harremanen arriskuaz informatuko dute eta horretarako diptikoak eta kondoiak banatuko dituzte.