Iturlandeta 2ko beheko aldean tanatorio edo beilatokia jarri behar dutela eta bere ezinegona agertu dute auzoko bizilagunek. «Ez dugu nahi inongo etxebizitzaren azpian tanatoriorik egotea, ez hemen eta ez inon ere», diote. Udalari ordenantza aldaketa bat egitea eskatzen diote bizilagunek eta horretarako uztaila erdialdera arte, sinadura bilketa bat egiten ari dira. Alkatetzatik diote, ordea, eskaria egin zenean indarrean zegoen ordenantzak beilatokia jartzea baimentzen zuela eta orain ezin dela gibelera egin «auzokoek egin duten ordenantzak aldatzeko eskaerak ez lioke eraginen martxan dagoen prozesuari. Hau da, horrekin ezin da bertan behera utzi tanatorioaren espedientea».
Bilera egin zuten bi alderdiek eta bertan, bizilagunek diote «heriotzarekin bertze harreman mota bat izateko eta hori gure seme-alabei trasmititu behar geniela, gure buruarekin lan berezia egin behar genuela adierazi ziguten udal ordezkariek». Landu beharreko bidea dela onartzen dute baina «oraindik ez gaude prest». Izan ere, «behartuta gaude hilaren senitartekoen oinazearekin topatzera, balkoira ateratzean, portalean, ondoko parkean eta hainbat momentutan» eta horregatik eskatu diote Udalari, ordenantzak aldatzeko «beilatokirik ez eraikitzeko edozein etxebizitzaren azpian, bai bere jardueragatik, baita ibiliko den jendetzagatik eta ibilgailuengatik ere, bizilagunak kaltetzen dituelako eta eguneroko jarduera normaltasunez egitea oztopatzen duelako». Udalak, bere aldetik, «gai honek sentsibilitatea ukitzen duela eta batzuengan kezka sortzen duela ulertu arren, egoera normaltasunera bideratu behar dela» uste du.
Azken hilabetean udal taldeek bilera bat baino gehiago egin dute gai honen inguruan eta solastekoak dira berriz ere. Bilera horietan ez da planteatu araudia aldatzea.