365 mendizale bildu zituen igandean Beti Gazte elkarteak hamabigarren urtez antolatutako Lesakako Mendi Itzuliak. Eguraldi bikaina lagun, batzuk 23 kilometroko ibilbide laburrena egin zuten eta gainerakoek 32 kilometroko luzeena.
Irteeran txalaparta doinuak izan zituzten lagun, baita kaxko batzuetan ere. Ibilbide laburra egin zutenek plazatik abiatu eta Nabazen barna Agiñara igo ziren, Domiko, Burnaiztegi, Pagolleta, Apittu eta Sastrinen barna, berriz ere plazan helmugaratzeko, 1.300 metroko desnibelarekin.
Ibilbide luzekoek ere bide berdintsua egin zuten, baina Apittutik Sastrinen barna jautsi beharrean, oraindik ere Unanue, Igantziko Kopara eta Frainera igo behar izan zuten mendizaleek, herrira jautsi aitzin, 1.800 metroko desnibela pilatuz.
Beti Gazte elkarteak eskerrak eman nahi dizkie mendi itzuliaren antolaketan lagundu duten pertsona eta erakunde guztiei.