Bertze urteetan bezala aurten ere Lesakan Euskaraz Bizi eguna antolatzen ari da Euskara Batzordea, ekainaren 23an San Juan bezperarekin bat eginez. Helburu nagusia euskararen erabilera sustatzea izan ohi da eta horretarako urtero herritar multzo ezberdinei zuzentzen zaio mezua. Aurtengoari dagokionez Lesakako gurasoetan eragin nahi dute; izan ere, euskararen erabilera neurtzen dituzten kale neurketa ezberdinek, gainbeherazko norabidea erakutsi baitute herritar multzo honetan.
Horretarako gurasoengana zuzendu nahi izan dute, eta Guraso Elkarteen bidez egitea erabaki dute.
Egitarauari dagokionez, muralak egin eta parke, ikastola, eskola inguruetan jarriko dituzte. Bortzirietako Bertso eskolak saio antzeztua eskainiko du eta Euskararen fruitu goxoak jolasean aritzeko aukera izanen da, guraso batek eta haur batek osatutako bikotetan. Lehenagotik izena eman beharko da. Euskara Batzordearen ekitaldia eta manifestuaren irakurketaren ondotik, sua piztuko da. Afari autogestionatua izanen da plaza inguruan eta dantzaldia.