Enaitzi laguntzeko elkartasun ekimenek aitzinera segitzen dute eta Enaitz Gara Guraso Taldeak antolatuta asteburu honetan Malerrekako Egunean parte hartu dute Litro bat esne Enaitzen alde kanpainarekin (argazkian) eta Beran eskainitako Nel Guardino del Suoni dokumentalarekin. Orain arteko ekintzak borobiltzeko eta babesa eskertzeko, ekainaren 7an egun handia prestatu dute, haurrentzako besta batekin.
Larunbat goizeko 11:00etatik 19:30era musikaz alaiturik, puzgarri, eskulan eta ezinduendako jolasetan parte hartzeko aukera izanen dute haurrek. Taloak, krispetak eta pintxoak jan eta tragoa hartzeko modua ere izanen dute. 19:00etan, berriz, merkatarien laguntzarekin osatutako hamar saskiren zozketa eginen dute. Horrez gain, sarreran haurrei doan banatuko dizkieten zenbakiekin Pirritx, Porrotx eta Marimototsen produktuak zozketatuko dituzte. Zenbaki sarituak Ttipi-Ttapa, Xorroxin, eskualdeko ikastetxe, zozketako boletoak saldu diren denda eta ostatuetan eta enaitzlagundu.org atarian argitaratuko dituzte eta sarituek hilabeteko epea izanen dute agertzeko.