Jakinen duzuenez, Euskal Herritarrok gure etorkizuna erabakitzeko dugun eskubidea aldarrikatzeko Gure Esku Dago dinamika martxan da. Proiektu honen baitan, hainbat dira Euskal Herriko herri eta auzoetan egiten ari diren ekintzak, baina hitzordu nagusia ekainaren 8an eginen da, erabakitzeko eskubidearen alde Durango eta Iruñea batuko dituen 123 kilometroko giza katea osatuz.
Arantzan ere Gure Esku Dago aldarrikapenarekin bat egiteko hitzordua paratua da eta maiatzaren 25ean izanen da, 12:00etan. Herritarren argazki bat eginen da plazan eta arlo desberdinetako herritar, talde eta eragileei parte hartzeko gonbitea luzatu die Gure Esku Dago lantaldeak. Argazkia ahalik eta koloretsu eta anitzena izan dadin, bakoitzak bere sentitzen duen arropa edo osagarriarekin joateko deia egin dute: dantzari, Mozorro Zuri, txistulari, trikitilari, txirrindulari, pilotari, karatelari, baserritar, Pelle-Ttiki edo Ekaitza Elkarteko zapiarekin, Mendi Itzuliko, eskolako edo Arantza Rockeko kamisetarekin...
Bertzalde, ekainaren 8ko giza katean parte hartzeko metroa Herriko Etxean edo Aterpean eros daiteke hilaren 31ra bitarte. Aranztarrak 108. kilometroan izanen gara, Itza herrian, Irurtzundik Iruñerako bidean. Herritik autobusa ere paratuko da Itzara joateko.