Joan den apirilaren 5eko arratsaldea ederra izan zen. Pirritx, Porrotx, Marimotots eta konpainiak herrira bisita egin zuen. Pelle Ttiki Haur Eskolak bizipozez eta auzolanean arratsaldea prestatu zuen eta erantzun ezin hobea izan zuen proposamenak, ehunka lagun hurbildu baitziren herriko frontoira. Hitzek, dantzek, kantek… tarte polit bat pasarazteko modua eman zuten. Pailazoak, dantzariak, Panpoxa, Txilibito, Loreto Hobeto, Lagun, Igor...
Bitartean, alkate, zinegotzi, gazte… haur eskolako hezitzaile, guraso, atautxi-amatxi, izeba-osaba talde bat opilak egiten, krispetak prestatzen eta ostatuan lanean aritu zen. Ikuskizunaren tartean eta ondotik eskaintza horiek estimatu zituzten bertaratutakoek. Pelle Ttiki Haur Eskolaz gain, Enaitz Berako haurtxoa present izan zuten pailazoek. Frontoi sarreran, Enaitz Gara guraso taldea kamisetak saltzen aritu zen eta jakin dugunez, kamiseta aunitz saldu zituzten.
Elkartasuna, auzolana, bizipoza… sentitu genituen eta Koldobike Gorostiza hezitzaileak egindako aurkezpenean, hasieratik aipatu bezala, mila esker Arantzara bertaratu zineten guzioi.