Urteak daramatza Berako Toki Ona ikastetxeak bere ikasleak atzerrian edota zenbait enpresetan euren formakuntza osatzera animatzen. Aurtengo ikasturtean ere, badira ideia horrekin bat egin dutenak. Hala, Goi Mailako Lanbide Heziketako zenbait gaztek bere prestakuntzaren zati bat ikastetxetik kanpo burutuko dute.
Alde batetik, Erasmus beka dela medio, Mekatronika Industriala ikasten duten hiru ikaslek, Lantokiko Prestakuntza modulua atzerrian eginen dute. Hauetatik bik, Italian gauzatuko dute egonaldia, eta bertzeak berriz Erresuma Batuan. Beka hauen iraupena, hiru hilabetekoa izanen da, apiriletik ekainera bitartekoa hain zuzen ere.
Bertzalde, Nafarroako Gobernuak hitzarmen berezi bat sinatua du Volks Wagen enpresarekin. Hitzarmen honi esker, Volks Wagenek Nafarroa osoko zenbait gazte hartzen ditu, Lantokiko Prestakuntza modulua, Iruñeko lantegian burutu dezaten. Praktika hauen iraupena, aurreko kasuan bezalaxe hiru hilabetekoa da, apiriletik ekainera bitartekoa alegia. Behin prestakuntza epea bukatuta, lan kontratu bat eskaintzeko aukera ere badagoela gaineratu dute eta baita, Alemaniara lanera joateko aukera ematea ere. Hain juxtu, aurten iaz bezalaxe, Mekatronika Industriala ikasten ari den ikasle bat, hautatua izan da, Volks Wagenera joateko. Aurreko ikasturteko ikasleak, hor bertan segitzen du lanean, lan kontratu batekin, eta suerte bera opa diote aurtengoari ere ikastetxetik.