Berako Isidoro Fagoaga Udal Musika Eskolako ikasleek Udaberriko kontzertua eskainiko dute apirilaren 2an, asteazken arratsaldeko 6:30etik aitzinera Kultur Etxean.
Egitarauari dagokionez, 4, 5 eta 6 urtekoen hastapen mailako gelak “Txinako jauregi batean” herrikoia joko dute; Katti Irastorzak bibolinarekin “Luonasi on sunnuntai” herrikoi finlandiarra; piano taldeak John Lennon eta Paul McCartneyren “Yellow submarine” ezaguna; txistu taldeak “Agurra” eta “Baserritarrak” euskal dantza herrikoiak; haurren abesbatzak Ken Zazpiren “Ilargia” eta Sorotan Beleren “Arratsalde honetan”; trikitixa taldeak Korrontziren “Arin latin”; Ane Pacheco, Ekiñe Taberna, Lorena Pérez, Leire Bereau eta Nerea Perez trikitilariek Kepa Junkeraren “Ny hyrarira”; talde instrumentalak Ken Zazpiren “Itsasoa gara” eta perkusio taldeak eta kitarra taldeak elkarrekin, Doctor Deseoren “Que amanece de nuevo” joko du emanaldia bukatzeko.
Aurrematrikulazioa
Bertze aldetik, 2014-2015 ikasturterako aurrematrikula epea ere ireki dute Isidoro Fagoaga Musika Eskolan. Matrikula eta musika tresna duten ikasleentzako martxoaren 31tik apirilaren 11ra zabalik dago epea. Musika tresna lehen aldiz aukeratzen duten ikasle eta ikasle berrientzako, berriz, aurrematrikula-epea maiatzaren 5etik 15ra irekiko da.