Arantzako Udalak Espainiko bandera Herriko Etxeko balkoian jartzeko agindua jaso zuen. Borondatez kontra, behartuta, jartzeko erabakia hartu behar izan zuen.
Inposaketa honen aitzinean, herritar talde batek gaitzespen idatzia banatu zuen etxez-etxe, sinadura bilketa abiatuz zenbait aldarrikapen egiteko: batetik, udaletxean espainiar bandera ikusteak atsekabea edo samina eragin duela adierazteko; bertzetik, sentimenduen zapalkuntza adierazten duenez, guziz errepudiatzen dutela errateko; hirugarrenik, nafar ikurra eta ikurrina ikur bakarrak direla aldarrikatzeko, gainetik bertzerik onartu gabe; isunen mehatxupean ere sentimenduak ez dituztela aldatuko adierazteko inposaturiko bandera udaletxean paratuz; eta azkenik, «bandera espainiarrik ez» ozenki aldarrikatzeko.
16 urtetik gorakoa izanez gero, sinatu daiteke herriko denda, ostatu, kooperatiba eta Herriko Etxean. Aipatzekoa da, Arantzan izan ditugun bi sentsibilitate politiko ezberdinetako alkateek (ezker abertzalea eta EAJ) sinatu dutela. Martxoaren erdialdera arte egin daiteke.