Azken alean “Baso ahaztuak” dokumentala eta solasaldia aipatu genituen eta orain gaineratu behar dugu ekitaldiek segida izan zutela otsailaren 16an. Zugarramurdiko bidean dagoen Oihanberri basora irteera antolatu zen. Hogei lagun inguru elkartu ziren eta parajea ezagutzeaz gain bertako landare eta zuhaitz espezieak aztertzeko aukera izan zuten; baita ikusi eta entzuten ziren hegaztiak ezagutzen saiatzekoa ere.
Oihanberri aberatsa da pago zein haritz motetan eta garai batean erabiltzen ziren kisulabe ugari daude. Egur-ikatza egiteko txondorren arrastoak ere ikusi ahal izan zituzten bertan. Goiz ederra pasatzeaz gain aunitz ikasteko aukera izan zuten bakoitzak zekiena taldearekin konpartitzen zuelako.