Beti Gazte elkarteak urteko ohiko batzarra egin zuen otsailaren 8an. Gaur egun 1.030 bazkide ditu eta horietatik 25 bat bertzerik ez ziren agertu egoitzara, baina halere urteko 95.000 euro inguruko aurrekontua eta hainbat berrikuntza proposatu eta onartu ziren.
Horietatik garrantzitsuena, elkarteko zuzendaritza batzordean hiru hamarkadetan eta azken 16 urteetan presidente izan zen Salvador Yanci zenaren omenez antolatuko den martxa zikloturista izanen da. Maiatzaren 11n eginen da eta Beti Gazte elkarteak ez ezik, Gure Txokoa, Baztandarra, Urtxintxa eta Erreka txirrindularitza taldeek parte hartuko dute antolaketan. Ibilbidea ehun kilometro eskasekoa izanen da, Lesakan hasi eta bukatu, eta Beran antolatzen zenean, Miguel Indurain martxaren ibilbide laburraren antzekoa.
Zuzendaritza batzordean ere izan da aldaketaren bat edo bertze. Honela, Lurdes Danboriena da idazkari berria. Gainera, sokatira taldea berriz ere lanean hasi denez, atal horretako arduradunak izanen dira Agustin Zubieta eta Beñardo Iantzi.