Ikasketaz fisikaria eta lanbidez dantzaria da Martxel Rodriguez. 2013ko udan bukatu zituen unibertsitateko ikasketak eta geroztik, Donostiako Dantzaz konpainiako kidea da, hau da, Europako dantzari gazteak lan merkatura bultzatzeko helburua duen plataformako partaidea. Nabarmentzekoa da orain arte talde honetatik pasatu diren dantzari gehienek profesionaletarako saltoa egin dutela. 23 urteko lesakarraren ustez, posible da dantzatik bizitzea eta bere kasuan, dantza hobby bat izatetik lanbide izatera pasatu da.
Gurutze PIKABEA
Zein ibilbide egin duzu dantza munduan?
Sei urterekin Lesakako Tantirumairu Dantza Taldean hasi nintzen, baina gazteagoa nintzenean ere etxean ez nintzen geldirik egoten. Gero, jazz eta ballet klasikoa ikasten hasi nintzen Hondarribian eta Donostian, eta azken honetan hamazazpi urte bete arte segitu nuen. Azkenik, Bilbon dantza garaikidea ezagutu nuen eta hiru urte eman nituen estilo hau ikasten.
Nola ailegatu zinen Dantzaz konpainiara?
Bilboko lagun batek Donostian gazteentzako dantza konpainia bat bazegoela aipatu zidan eta sartzera animatu. 2012ko Eguberrietako oporretan audizioa egin eta baiezkoa eman zidaten. Hala ere, konpainian eguneroko lanean 2013ko uztailera arte ez nintzen hasi, ikasketak bukatu arte, hain zuzen. Hagitz esperientzia positiboa izaten ari da, batez ere dantza hobby edo eskolaz kanpoko ekintza izatetik lan bat izatera pasatu delako. Konpainia honen gauzarik onenetakoa bertan lantzen den errepertorioa da. Izan ere mundu guztiko koreografoekin lan egiten dugu eta hagitz maila altua dute. Dantza garaikidea eta neoklasikoa lantzen ditugu, koreografoaren arabera estilo bat edo bertze. Beti ere beharrezkoa dugu dantza klasikoko oinarri sendo bat edukitzea.
Nolako konpainia da Dantzaz?
Dantza munduan lehen enplegua lortzeko plataforma da. Bi urte egon gaitezke gehienez eta denbora horretan, etengabeko lana eta aktuazioak egiteaz gain, Europan barna konpainietan lana bilatzen saiatu behar dugu. Horretarako, gure curriculuma hobetzen laguntzen digute eta audizio desberdinei buruzko informazioa ematen digute.
Nola lan egiten duzue?
Gure ordutegia 09:30etik 18:00etara bitartekoa da. Goizero konpainiako zuzendari artistikoak ballet klase bat ematen digu beroketa modura. Eta segidan aitzinean ditugun aktuazioen arabera, errepertorioko piezak entsaiatzen ditugu. Bazkaltzeko ordu bateko atsedena hartzen dugu. Oraingoz hagitz lanpetuak gabiltza eta hortaz kontent. Hala ere, bizi dugun krisi egoeran kultura da azkenerako uzten dena eta honen barrenean normalean dantza da guttien jasotzen duena eta hori nabaritzen da.
Zer da dantza zuretzat?
Dantza bertze edozein arte bezala espresio modu bat da, kasu honetan, gorputzarekin eta honen mugimendu edo mugimendu ezen bidez eraikia.
Lesakako Ezpatadantzarien taldeko kapitaina ere bazara...
Hagitz berezia da Ezpatadantzaria izatea, sanferminak bertze modu batera bizitzen dira. Aitzineskua izanen naiz sanfermin hauetan eta horrek urduritasuna handitzen du, baina espero dut dena ongi joanen dela.
Dantzaria ala fisikaria zaitugu?
Biak. Gustuko nuelako fisika ikasi nuen eta horri esker hagitz jende interesgarria ezagutu ahal izan dut, baita betirako lagunak egin ere. Orain bertze etapa batean nago, bertzerik ez. Gaur egun, nire ogibidea dantza da eta espero dut epe labur eta ertain batean hala izatea. Zoritxarrez, gure inguruan oraindik badago jendea erraten didana «eta horrelako karrera bat egin duzu dantzan bukatzeko?».
Zein da dantzari on bat izateko sekretua?
Diziplina, gogoa, erotasun puntu bat eta berezko sentsibilitate edo talentu pixka bat behar dira.
Zein da zure ametsa?
Amets aunitz ditut, batzuk dantzarekin lotuak eta bertzeak ez. Nahiago dut balizko egoerak imajinatzen egon beharrean, egunean egunekoaz gozatu.
URTEKO AGENDA
Agenda betea du Martxel Rodriguezek Dantzaz konpainiarekin: otsailean Donostian hainbat saio eskaini dituzte. Martxoan, berriz, Murtzian eta Xixonen izanen dira, apirilean Turinen, Reusen eta Basaurin eta maiatzean Donostian ikuskizunak eginen dituzte.
DANTZA LANBIDE
«Gure inguruan oraindik bada jendea erraten didana ‘horrelako karrera egin duzu dantzan bukatzeko?’»