Aurten Bidasoaldeko Hazi Sareak, Bidazi Kontsumo Elkarteak eta Nafarroako Hazi Sareak bi ekitaldi antolatu ditu hazien eguna ospatzeko. Lehenbizikoa otsailaren 8an egin zen Elizondon eta bigarrena otsailaren 22an, larunbatean eginen da Beran.
10:30ean hasita hazi trukaketa eginen da Rikardo Baroja eskolako idorpean eta eztabaida gune irekia zabalduko da. Han mahai batzuk izanen dira, ekartzen diren haziak paratzeko, eta noski, han direnak nahi dituenak hartzeko. Mahai horien inguruan, hazi bakoitzari buruzko ezagutzak elkarbanatu nahi dituzte.
13:00etan “Norberak bere animalientzat artoa ekoiztu eta aurrera ateratzeko moduak” solasaldia eskainiko du Mikel Altzuart nekazari baztandarrak Gure Txokoa elkartean. Izan ere, garrantzia berezia emanen diote aldi honetan artoari: «behar-beharrezkoa ikusten dugu gure eskualdean aspalditik ereiten diren arto-haziak biltzea, horiek elkarbanatu, zabaldu eta haziak hobetzeko asmoz. Artoa garrantzitsua da aziendak bazkatzeko, baina baita jendeontzat ere, arto-opilak edo taloak egiteko», diote antolatzaileek.
14:30ean bazkari autogestionatua izanen da leku berean. Alea, banabarrak, bertako barazkiak eta nahi duen orok etxean egindako janaria eraman dezake. Berako ekitaldia antolatzeko, Rikardo Baroja eskolaren eta Gure Txokoa elkartearen laguntza izan dute antolatzaileek.