Bortzirietako Gizarte Zerbitzuetako Mankomunitateak zaintzaileei zuzendutako tailerra martxan paratu behar du otsailetik aitzinera. «Denbora daramagu horrelako esparru bat sortu nahian, mendekotasun ezberdina ( helduak, gaixotasun mentala, ezintasuna…) dutenen zaintzaileei gune bat eskaini nahi diegu, zainketak dakartzan gorabeherak eta zalantzak bideratzeko» jakinarazi dute Mankomunitatetik.
Zainketa mota hau, gehienetan familiak egiten du eta hagitz lotua da, 24 ordu, 365 egun eta isiltasun eta intimitatean egiten da. Jokin Apezetxeak, Mankomunitateko teknikariak aipatu digunez, «helduen zainketa, ez da haurrena bezala: ez dakizu noiz hasi daitekeen eta badakizu makurragora joan behar duela. Gogorra da». Zerbitzua, zaintzaile guztiei zuzendua dago, bai familiakoak izan, edo baita profesionalki horretan lan egiten dutenei ere. Gaiaz jarduteko, esparru berri hau sortu dute eta Arnasgunea izanen du izena.
Bi motetako helburuak izanen dituzte. Alde batetik, zaintzaileei entzutea: kezkak, emozionalki daramaten zama, kontziliatzeko zailtasunak… Eta bertze aldetik, teknikoki informatzea eta irakastea: gaixotasunaren garapenaz informatu, mobilizatzeko teknikak erakutsi, baliabide eta laguntzetaz informatu.
Zerbitzua Ramoni Ordoki psikologoak koordinatu behar du. Otsailetik aitzinera asteartero izanen da, 12:15etik 13:30k bitarte. Bilera lekuak txandakatuko dituzte, aste batean Beran eta hurrengoan Lesakan elkartuz. Otsailaren 4an Beran izanen da eta 11n Lesakan. Beran Beralandetan bilduko dira eta Lesakan Herriko Etxeko bigarren solairuan, Batzorde Gelan.
Izen emateko, 948 635 036ra deitu edo ssb@lesaka.net helbidera idatzi behar da. Zerbitzua doakoa da eta difusioa, Bortzirietako Oinarrizko Gizarte Zerbitzu eta Osasun Etxetik eginen da.