Harrera beroa izan zuen urtarrilaren 18an, Harriondoa Kultur Etxean egindako ‘Gure esku dago’ ekimenaren aurkezpenak. Parte hartzaile eta ikusleen artean 100 lagun inguru bildu ziren Euskal Herriak duen erabakitzeko eskubidearen aldeko egitasmoaren aurkezpenean. Amaia Eneterreagak eta Maite Bidarte aurkezleek hasi zuten ekitaldia. Segidan, Dani Oiarbidek, Idiazabaldik etorritako gonbidatuak hartu zuen hitza. Nazioen Mundua herri ekimeneko ordezkaria da bera eta beraien herriko esperientzia kontatu zien ikusleei. Ondoren, Tantirumairu euskal folklore taldeak, Trikitixa Taldearen laguntzaz, Dantza Zati bat ikuskizuna eskaini zuen.
‘Gure esku dago’ dinamikak esku artean dituen ekimenen artean, ekainaren 8an Iruñea eta Durango batuko dituen gizakatea dago. Baztan-Malerreka-Bortziriak eskualdeko biztanleek ere beraien lekua izanen dute, 108. km-an hain zuzen ere, Itza herrian. Katea osatu ahal izateko 400 lagun bildu beharko dira eskualdean. Herriko hainbat ostatu eta komertziotan izena emateko zerrendak jarri dituzte. Gizakaterako motorrak berotzen hasteko, Eskuz Esku ekimena jarriko da martxan. Datozen egunetan hasi eta ekainera bitartean, Euskal Herri osoan zehar ibiliko da. Eskualdera lekukoa martxoaren 10ean iritsiko da eta 16ra bitarte, erabakitzeko eskubidea ardatz hartuta kultur ekitaldi desberdinak antolatuko dira herritarren parte hartzearekin.