Aste Santuan irekitzekotan dira Irisarri inguruan egiten ari diren Irrisarri Land kirol eremua. Mendi bizikletan ibiltzeko eta saltoak egiteko zirkuituaz gain, Europako tirolina zirkuitu handienetako bat eskainiko du. Izan ere, zazpi tirolina izanen ditu bata bertzearen ondotik, 2 kilometro terdiko ibilbidea osatuz. 900 metroko tirolina ere izanen du, estatuko luzeena.
Urtarrileko lehen asteetan, helikopteroak eta bertze baliabideak erabiliz, tirolinetarako 4.000 metro kable hedatu zituzten, baita 40 metroko saltoa eskainiko duen Stira-t penduloa jasoko duen zubi esekia ere.
Irrisarri Land kirol eremuko arduraduna den Hegoi Ado beratarrak aipatu digunez, «tirolina eta pendulo instalazioek naturaz gozatuz esperientzia eta abentura ikusgarriak emanen dituzte». Horretaz gain, instalazio guziak segurtasun neurri zorrotzenak betetzen dituela azpimarratu nahi izan du.