Zenbait udal partzela herritarren eskura paratu nahi ditu Herriko Etxeak aisialdirako baratze modura erabil ditzaten. Baratzeetan norberak kontsumitzeko produktuak bakarrik landatu daitezke eta etxeko erabilerarako utziko dira; horrenbertzez, debekatua dago bertatik ateratako produktuak saltzea. Ordenantza honen xedea zenbait herrilur erabiltzea eta horiei balioa ematea da.
Herrian erroldatutako edozein pertsonak egin ahalko du eskaera. Erabiltzaileen eskaeren zerrenda eginen da eskaerak aurkeztutako egunaren arabera. Zerrenda horretako ordenari jarraituta gauzatuko da baratzeen erabileraren kontzesioa, eta lehentasuna izanen dute langabeek, jubilatuek, pentsiodunek, edo urritasunen bat dutela egiaztatzen dutenek. Interesatuek 012ra deitu behar dute urtarrilaren 31 baino lehen.
Jende kopurua zehazten denean udalak antolatuko du lurraren banaketa; baratzeen kokapena kanposantuaren parean, Kaxerna-Eztegara eta igerilekuaren inguruan izanen dela aurreikusten du Udalak. Behin zerrenda osatzen denean bilera bat eginen da interesatu guztiekin, baldintzak azaltzeko, egokia ikusten bada ikastaroren bat antolatzeko eta komunean izan daitezkeen baliabideak aipatzeko.
Badira lehendik herri lurrak baratzetako erabiltzen dituzten herritarrak, horien egoera ordenantzara egokitzeko pausuak emateko Udala paratuko da harremanetan interesatuekin.