Bortzirietako bertso eskolak hamabosgarren aldiz antolatutako Taldekako lehiaketa jokatuko da egunotan., 2013 eta 2014 urteak uztartuz. Lehen kanporaketa abenduaren 29an, igande eguerdian jokatuko da Lesakako Kultur Etxe estreinatu berrian eta finala urtarrilaren 4an eginen da, Arrano elkarteko afalondoan. Denera, zazpi hirukote ariko dira.
Aipatu bezala, abenduaren 29an, igande eguerdiko 12:30ean jokatuko da Lesakako Harriondoa Kultur Etxean lehen kanporaketan. Alde batetik, Eneko Fernandez eta Juan Mari eta Maialen Lopez aita-alabak ariko dira eta bertzetik, Xabier Terreros, Iban Garro eta Josu Sanjurjo.
Urtarrilaren 3an, heldu den ortziral arratseko 10:30ean, Berako Katakun Berako bi talde izanen dira aurrez aurre: Patxi Castillo, Aitor Elexpuru eta Jokin Pinatxo batetik eta Asier Saragueta, Anjeltxo Aranibar eta Julen Zelaieta bertzetik.
Urtarrilaren 4an jokatuko dira gainerako saio guziak Lesakan. Larunbat arratsaldeko 3etan, Teleboten ariko dira Xabier Silveira, Iñigo Olaetxea eta Ioar Tainta alde batetik eta Malerrekako taldea bertzetik (Iker eta Egoitz Gorosterrazu anaiak eta Ander Fuentes “Itturri”). Arratsaldeko 4:30ean Koxkilan ariko dira Kultur Etxeko saioan irabazle suertatu ez zirenek, Baztango taldearen kontra (Bittor eta Amaia Elizagoien aita-alabak eta Xabi Maia).
Ondotik, finalerdian txanda etorriko da. 18:00etan Txarutan jokatuko dute lehenbizikoa Berako saioko irabazleek Kultur Etxeko saioko irabazleen kontra eta bigarrena 19:00etan Zialdon izanen dute, Teleboteko irabazleek Koxkilako irabazleen kontra.
Finala Arranon jokatuko da. 21:00etan afaria eginen da eta ondotik finala. Afarirako txartelak 15 eurotan eros daitezke. Izena emateko bortzibertso@gmail.com helbide elektronikora idatzi edo 618963011 telefonora deitu behar da.