Abenduaren 14 eta 15ean jokatuko dira Bortzirietako eskuz binakako XIII. txapelketako finalak.
Larunbat goizeko 10etan hasita jokatuko dira lehendabiziko finalak Lesakan. Ttikien kategorian, Arkupeko Aitor Galardi eta Jon Galardi, Gure Txokoako Andoni Latorre eta Koldo Lacar-en kontra ariko dira. Umeak B kategorian, Arkupeko Eloi Sanchez eta Oihan Etxeberriaren kontra. Kimuak B mailan, Irungo Iker Amiano eta Unai Amianok lortua dute finalerako txartela eta larunbat honetan jokatzekoa zen finalerdiko irabazlearen kontra ariko dira. Umeak A mailan, azkenik, Gure Txokoako Unai Alzugarai eta Andoni Telletxea eta Unai Lluzia eta Jon Pagola izanen dira aurrez aurre.
Igande goizeko 10etan hasita, Berako Eztegaran jokatuko dira bertze finalak. Kimuak A mailan, Gure Txokoako Josetxo Sese eta Asier Telletxea, Txarutako Mikel Ariztia eta Beñat Etxebereren kontra ariko dira. Haurrak kategorian, Arkupeko Aimar Otxoteko eta Gure Txokoako Oier Larretxeak ez zekiten oraindik zein izanen zuten arerio hau idazterakoan, Kadete mailan, Gure Txokoako Mikel Eltzaurdia eta Oiarpeko Ekain Etxeberria, Arkupeko Jonan Fagoaga eta Beñat Ordokiren kontra ariko dira. Gazteak B mailan, Gure Txokoako Antoni Lazkanotegi eta Ultzamako Xabier Aizpuruaren arerioak asteburu honetan erabakitzekoak ziren eta Gazteak A mailan, Gure Txokoako Ander Errandonea eta Mattin Garbisu, Xabi Alkasena eta Xabi Mendy taldekideen kontra ariko dira.
Sari banaketa Berako partiden ondotik eginen da. Bortzirietako pilota eskolak tablet bat eta Martikoko bi lote zozketatuko ditu finalak bukatzerakoan.