Santa Barbara mendiaren magalean, Larrategaina inguruan paratu du Nafarroako Gobernuak metereologia estazio automatiko berria, datuak denbora errealean ematen dituena. Honela, gisa honetako 20 estazio daude Nafarroan eta bertze 9 datuak denbora errealean ematen ez dituztenak.
Estazio hauek guziek sentsoreak dituzte, tenperatura, hezetasun erlatiboa, euri prezipitazioak, eguzki erradiazioa eta 10 metroko altueran haizearen abiadura eta norabidea neurtzen dutenak. Hamar minutuero biltzen dituzte datuak eta Nafarroako Gobernuaren metereologia orrialdean sartzen dute informazioa.
Denbora errealean ematen diren datu horiek baliagarriak izan dira larrialdi egoeretan, hala nola sute, uholde eta haizete handietan. Edozeinentzat eskuragarri daude datu horiek eta jendeak gero eta interes handiagoa du horiek jakiteko. Hala, metereologia webguneak (meteo.navarra. es) 1.400.000 bisita jaso zituen urrian, joan den urte osoan baino gehiago.