Igantziko Euskara Batzordeak prest ditu aurtengo kultur egunak. Abenduaren 6tik 8ra bitartean mota guztietako ekitaldiak prestatu ditu, horietako batzuk Sanmigelen aitzineko astebururako programatuak zirenak dira, Saioaren zoritxarreko istripuarengatik bertan behera gelditu zirenak.
Ortzirala, abenduak 6
• 16:00etan haurrentzako pelikula bat izanen da eskolan.
• 17:30ean bi orduz, eskolako ordenagailuen gela irekia egonen da, nahi duen guztia joateko.
• 21:00etan Baratzondon, Bat-batean. Munduko musikekin bertsotan izeneko emanaldia izanen da. Ikuskizun horretan Oskar Estanga bertsolari eta musikariak eta Miel Mari Elosegi Luze bertsolariak, munduko kantu eta doinu ezagunekin osatutako bertso saioa eskainiko dute, hainbat musika tresnaz lagundurik.
Larunbata, abenduak 7
• 16:30ean hasita herriko dantzariek karrikabuelta eginen dute, zenbait tokitan beren dantzak eskainiz. Bitartean, euskara batzordeko kideek herriko zenbait etxeri errotulua paratuko diote.
• 18:00etan dantza taldeak saio labur bat eskainiko du frontoian.
• 21:00etan teatroa izanen da Baratzondon. Txirene taldeak Sarean zintzilikaturik antzezlana eskainiko du.
Igandea, Abenduak 8
• 11:30ean haurren arteko herri kirol saioa izanen da frontoian. Lehiatuko direnak Igantziko eta Basaburuko neska-mutikoak izanen dira.
• 12:00etan Igantziko X. Gazta Lehiaketa izanen da. Urtero bezala, herritarrek ekarritako gaztak dastatu beharko ditu epaimahaiak. Ondotik banatuko dira sariak. Eguraldia lagun, lehiaketa frontoian izanen da, eta, bertzela, Biltoki elkartean.
• 17:00etan trikitixa jaialdia izanen da frontoian. Bertan parte hartuko dute herriko trikitilariek eta panderojoleek, baita inguruko hainbat herritakoek ere.
• 18:00etan berendua izanen da frontoian. Opilez eta sagardoaz gainera, lehiaketako gaztak dastatzeko aukera ere izanen da.