Berako Santa Barbara mendiaren magal batean, Larrategaina inguruan paratu du Nafarroako Gobernuak metereologia estazio automatiko berria, datuak denbora errealean ematen duena. Honela, Ultzaman jarri berri dutenarekin batera, gisa honetako 20 estazio daude Nafarroan eta bertze 9 datuak denbora errealean ematen ez dutenak.
Estazio hauek guziek sentsoreak dituzte, tenperatura, hezetasun erlatiboa, euri prezipitazioak, eguzki erradiazioa eta 10 metroko altueran haizearen abiadura eta norabidea neurtzen dutenak. Hamar minutuero biltzen dituzte datuak eta Nafarroako Gobernuaren metereologia orrialdean sartzen dute informazioa.
Denbora errealean ematen diren datu horiek baliagarriak izan dira larrialdi egoeretan, hala nola sute, uholde eta haizete handietan. Edozeinentzat eskuragarri daude datu horiek eta jendeak gero eta interes handiagoa du datu horiek jakiteko. Hala, Nafarroako Gobernutik jakinarazi dutenez, metereologia webgune horrek 1.400.000 bisita jaso ditu urrian, joan den urte osoan baino gehiago.