Eguraldi hagitzez hobea izan arren, joan den urtean baino kirolari guttiago bildu zen urriaren 26an Lizuniagako Igoeran. Denera 80 korrikalari atera ziren proba nagusian eta bertze hainbat neska-mutiko ibili ziren lehenago ttikiagoei zuzendutako probetan.
Proba nagusiari dagokionez, gizonezkoen artean Victor Madejon irundarrak irabazi zuen (17’57”), segundu bat gehiago behar izan zuen Santi San Miguel donezteberrak eta hirugarren Juan Karlos Korta irundarra izan zen (18’26”). Denak ere, 2008an Abdelfettah Louajarik egin zuen errekorretik (16’01”) urrun. Lehenbiziko beratarra Ibai Iturria izan zen (zazpigarren sailkapen orokorrean, 19’06”ko denborarekin), Juan Luis Irazoki (19’18”) eta Iñaki Pikabearen aitzinetik (19’37”).
Emakumeetan lehendabizikoa Maika Ariztegi iturendarra izan zen, 23 minutu eta 36 segunduko denborarekin (aurtengoarekin hamaseigarren aldiz irabazi egin du Berako proba). Bigarren Leire Telletxea beratarra izan zen (25’11”) eta hirugarren Irene Matxiarena beratarra (26’22”).