Nafarroako Gobernuak hitzarmena sinatu du berriki Osasunbideko eta Osakidetzako ordezkariekin. Horren ondorioz, Bortzirietako inguruko biztanleen historia klinikoak kontsultatzeko aukera izanen dute aurrerantzean Nafarroako medikuen sare publikoko langileek eta baita Euskal Autonomia Erkidegoko profesionalek ere.
Lesaka, Bera, Etxalar, Igantzi eta Arantzako 8.486 biztanleei eraginen die neurriak. Bortzirietako herritarrek Osasunbideko profesionalen eskutik jasotzen dute lehen mailako arreta baina arreta espezializatua behar dutenean Irungo Bidasoa Eskualdeko Ospitalean joaten dira 1989az geroztik, alegia, zentroa ireki zutenetik. Gertutasun geografikoa eta errepideen loturak izan dira Bortzirietako herritarrak Osakidetzan artatuak izatea eragin dutenak. Orain arte pazientea arduratu izan da txostenak erakunde batetik bestera eramateaz eta, ondoren, agiriak eskaneatu behar izaten ziren historia klinikoan gordetzeko. Urrats horiek, batzuetan, ez ziren behar bezala betetzen eta osasunaren alorreko profesionalek informazio-hutsuneak izaten zituzten, horrek erabiltzaileei arreta egokia ematea eragotziz.
Lan hitzarmenaren ondorioz, Bortzirietako herritarren historia klinikoetarako sarbide partekatua izango dute Osasunbideko eta Osakidetzako profesionalek. Historia klinikoak erabat informatizatuta izanen dituzte eta hala, bi erakundeetako txostenak ordenagailu bidez eskuratzeko aukera izanen dute bateko zein bestekoek.
Zehazki barne-medikuntza, traumatologia, endokrinologia, ginekologia... arloko arreta jasotzen dute Bortzirietako herritarrek Irungo Ospitalean. Eta onkologia eta kardiologia bezalako espezialitateetarako Donostian artatzen dituzte, Irunen ez baita espezialitate horien arreta ematen.