Bortizkeriari aurre egiteko gai zera izenburupean Emagin taldeak eskainiko duen autodefentsa ikastaroa antolatu du Bortzirietako Oinarrizko Gizarte Zerbitzuen Mankomunitateak, emakume, nerabe, gazte nahiz adintuei bideratua. Azaroaren 22an emanen da Lesakako udalak Koskontako Bideko 7an, Osasun Etxearen pareko pisuan duen erabilera anitzeko aretoan, ortziral arratsaldeko 17:00etatik 21:00etara.
Mankomunitatetik diotenez, «gure gizartean emakume pasiboen ideia transmititu gaituzte, biktimaren papera areagotuz» eta alde horretatik ikastaro dinamiko eta praktikoa izanen da, non arlo fisikoa zein psikologiko-emozionala landuko den.
Indarkeri ezberdinak identifikatu, autodefentsa landu, konfiantza transmititu eta bertze hainbat arlo landuko dituzte.
Martxoan Lesakan egin zen gisa honetako bertze ikastaro bat eta ebaluazioa hagitz positiboa izan zen. Horregatik, azaroan errepikatzea erabaki dute. Telefonoz izena eman behar da 948 635036 telefonoan eta emakumeendako ez ezik, gurasoendako ere baliagarria da, «gure seme-alaben hezkuntzan errealitate hau kontuan hartu behar baitugu».
Emakumeenganako indarkeriaren kontrako Nazioarteko Eguna
Ortziralekoa ez da izanen azaroaren 25eko Emakumeenganako Indarkeriaren Kontrako Nazioarteko Egunaren harira Bortzirietan eginen den ekitaldi bakarra. Ortziralean berean, Arantzako baskulan solasaldia izanen da 20:00etan.
Azaroaren 24ean, igande arratsaldeko 6etan Alardearen seme-alabak filma eskainiko dute Berako Kultur Etxean. Haur txoko zerbitzua ere eskainiko da eta horretarako beharrezkoa da izen ematea 948 635036 telefonoan.
Azaroaren 25ean, astelehen arratsaldeko 5etan Mutildantzak. Nondik eta nora solasaldia eskainiko du Elurre Iriartek Igantziko Udaletxean.
Herriz herri elkarretaratzeak eginen dira egunotan. Azaroaren 22an, ortziral arratsaldeko 7etan Arantzan; azaroaren 24an, igande eguerdiko 12:00etan Igantzin eta 13:00etan Beran, Etxalarren eta Lesakan. Azaroaren 25ean, astelehenean 13:00etan Berako Toki Onan eginen da elkarretaratzea.