Eguraldi ezinhobea egin zuen eta jende aunitz hurbildu zen urriaren 20an usategietara. 14 uso erori ziren sareetan eta han suertatu zirenek, usoak sareetatik nola ateratzen zituzten ikusteko zortea izan zuten. Goizean hurbildutakoek saski eder baten zozketan parte hartzeko boletoak erosi ahal izan zituzten, eta Azpeitiko batzuk suertatu ziren saridunak.
Bisiten inguruan berriz, aurten inoiz baino jende gehiago ari da animatzen bisitak egitera (tartean baita herritar batzuk ere, espreski antolatutako bisitetan). Usategietako igandean 52 lagunek egin zuten bisita. Goizean Lizaietan egon zen talo postua hagitz arrakastatsua izan zen. Arratsalde-ilunabarrean ere plaza ingurua beteta egon zen eta Kupela taldearen erromeria doinuekin egunak akabera polita izan zuen.