Sare sozialen inguruko hiru orduko trebakuntza saioa antolatu du Bortzirietako Euskara Mankomunitateak. Azaroaren 6an emanen da Lesakako euskaltegian, Matxinbeltzenean, 17:00etatik aitzinera, teknologia berrien eta sare sozialen euskarazko erabilera bultzatzea, eta bereziki euskara ikasleak motibatzeko helburuarekin.
Lander Arbelaitz, Argiako kazetaria eta sare sozialetan aditua izanen da trebatzailea. Izen emateko epea urriaren 28tik azaroaren 5era zabalik izanen da, Mankomunitateko 948 634125 telefonoan edo euskara@bortziriak.org helbide elektronikoan. Euskara ikasleek, solaslagunek eta langabetuek doan izanen dute saioa eta gainerakoek 10 euro ordaindu beharko dute. 12-15 laguneko taldea osatu nahi dute. Ordenagailu eramangarria eramatea eskatzen zaie parte hartzaileei, baina bertan ere hiruzpalau izanen dira uzteko. Parte hartze ziurtagiria ere emanen da ikastaroaren bukaeran.
Edukiei dagokienez, zer den sare sozial bat, zeintzuk diren sare sozialik erabilienak, zer komunikatu daitekeen sare sozial batean, zein abantaila duen norberarentzat edo norbere enpresarentzat sare sozialetan aritzea, nola eman daitekeen alta sare sozialetan eta behin alta emanda zein ohitura hartu behar diren sare sozialetan emandako alta eraginkorra izateko ikasiko dute.