2014ko Aste Santuan ireki gogo duten Igantziko Irisarri Jauregiko Opor Zentroak ostatu hartzeko eta aisialdia, natura eta abentura barnean hartzen dituen landa-turismoko kontzeptu berritzailea jarriko du martxan. 20 eta 30 lanpostu artean sortuko ditu eta, kalkuluen arabera, zeharka 150 bat lanpostu sustatuko ditu irailaren 26an obrei egindako bisitan emandako datuen arabera.
Yolanda Barcina, Nafarroako Gobernuko presidentearen bisita jaso zuten Irisarrin. Presidentearekin batera bertan izan ziren Kultura, Turismo eta Erakundeekiko Harremanetarako kontseilari Juan Luis Sánchez de Muniáin eta Turismo eta Merkataritzako zuzendari nagusi Carlos Erce, baita Lurdes Ibarluzea alkatea eta zenbait zinegotzi ere.
75 hektarea hartzen dituen opor-zentro horrek ezaugarri eta prezio ezberdinetan ostatu hartzeko hiru modalitate izanen ditu –hotela, etxolak eta aterpetxea– eta 200 lagunentzako lekua du. Oporretako gune hori familia eta bisitari-taldeentzat da, bai eta taldeen prestakuntza sustatzeko topaguneak egin nahi dituzten enpresentzat ere. Bertzalde, kirol eta hizkuntzen turismoa ere erakarri nahi da; azken horrek gero eta eskaera handiagoa du beren oporrak hizkuntza bat ezagutzeko jarduerak egiten dituztenen artean. Azkenik, eta elementu bereizgarri modura bertze opor-aukera batzuekiko, bertako jarduerak erabiltzeagatik sarrera bat ordaintzen duten eguneko bisitariak hartzeko pentsatutako guneak sortu dira.
Irisarriko Jauregia, 17 gela dituen apartahotel batean bihurtuko da. Opor-zentroak, gainera, estetika finlandiarreko 12 etxola ditu eta aterpetxean 48 pertsona sartzen dira, 4 eta 12 pertsona arteko logeletan.
ESTATUKO TIROLINARIK LUZEENA
4.000 metro koadroko eremuan turismo aktiboko espazioak ere izanen ditu, ostatu hartuta dauden bezeroek ez ezik, egunean zehar bisitariek erabili ahal izateko sarrera ordaindu ondoren.
Mendiko bizikletarako 4 pisten zirkuitua eta Bike Park edo bizikletaz jauziak eta akrobaziak egiteko espazioa du proba ofizialak hartzeko harmailekin. Gainera, “Cannopy" zirkuitu bat ere egiten ari dira bi ibilbidetan banatuta. Europako handienetako bat da, 2,5 kilometro ibilbidea baitu. Lehen ibilbidean 250-300 metro arteko 7 tirolinatan aritzen da. Ibilbide hori bukatzean, 840 metroko tirolina handitik jauzi egiteko aukeraz gozatu liteke, estatu osoko luzeena izango dena.