Irailaren 14an burutu zen Donibane Lohizunen Ironbask probaren bigarren edizioa. Joan den urteko lehenbiziko edizioan, Ironman distantzian ( 3.860 metro igerian, 180 kilometro bizikletan eta maratoia lasterka) garaile izan zen Bixente Igarzabal lesakarra hirugarren izan da aurtengoan, nahiz eta joan den urteko marka 3 minututan hobetu (9h 53’07”). Gregory Verschuere frantziarra izan zen garaile (9h 30‘20”) eta bigarren izan zen Yann Le Dorze frantziarrak baino 21 minutu eta 27 segundo guttiago behar izan zituen. Donibane Lohizuneko podiumarekin bukatutzat eman du denboraldia Igarzabalek. Ornoko haustura baten ondorioz ezin izan zuen apirilera arte hasi, baina halere denboraldi polita egin du, laugarren sailkatu baitzen Altrimanean eta orain hirugarren Ironbask lasterketan.
DISTANTZIA OLINPIKOA
Baina lesakarra ez zen Ironbaskeko podiumera igotzea lortu zuen eskualdeko kirolari bakarra izan. Ironman probaz gain, bertze hiru distantziatan lehiatu ziren kirolariak eta Ugaitz Garde gartzaindarrak hirugarren postua lortu zuen distantzia olinpikoan (1.500 metro igerian, 40 kilometro bizikletan eta 10 kilometro lasterka).
Hirugarren gelditu zen gartzaindarra 380 partehartzaileren artean. Irabazlea Martin Liebeck izan zen (2h 19’), bigarrena (ganden urteko irabazlea) Stephane Arraygo izan zen (2h 22’ 02”) eta hirugarren Ugaitz Garde izan zen (2h 25’01”).