Urriroko kultur ekitaldian leku berezia eta aipagarria du laugarren igandeko Lurraren Egunak. Baina gasnagile, sagardogile, eskulangile eta baratzezainek urriaren 27rako beraien lanak prestatzen eta zaintzen dituzten bitartean, bertze hainbat ekitaldi eginen dira Beran.
Honela, urriaren 13an, igande arratsaldeko 5:30ean haurrentzako ikuskizuna izanen da Kultur Etxean. Kiliklon Ekoizpenak taldearen eskutik Kortxea Doktorearen abenturak… eta Musika Tresnen Fabrika lana izanen da ikusgai. Kultur Batzordeak 3 eta 9 urte bitarteko haurrentzat antolatu duen ekitaldira sartzeko 5 euro ordaindu beharko dira, baina sarrerarekin batera oparia izanen dute. Urriaren 18an, 2 eta 7 urte bitartekoentzako ipuin kontalaria izanen da herri liburutegian, 18:00etatik aitzinera Miru eta bere lagunak ipuina kontatzen. Hilaren 20an, Emaitza antzerki taldeak Esperando a la inglesa taularatuko du 18:30etik aitzinera Kultur Etxean. Lurraren Egunaren bezperan, hilaren 2an, Lizuniagako Igoeraz gain, Bera kantari ekimenaren edizio berri bat eginen da, 19:00etan Illekuetatik hasita.