Bai Euskarari Ziurtagiriarekin 2005ean hasi ziren Bortzirietan. Harrez geroztik, makina bat entitatek euskararen aldeko konpromisoak hartu dituzte. Udaberri partean ziurtagiridunek hartutako konpromisoak ebaluatzen aritu da Bai Euskarari Ziurtagirien elkartea. Guztira, 81 entitatek berritu dute ziurtagiria, eta badira bi ziurtagiridun berri: Ireki Leihoak eta Usi Garbiketak.
Urteen joanean ziurtagiridunen kopurua gutxitu egin da. Azkeneko hiru urte hauetan Bortzirietan badira 90 inguru ziurtagiridun. Herri txikietan ziurtagiridun kopurua mantendu egin da egitasmoa abian jarri zenetik. Edozein gisatara, Bortzirietan ziurtagiridun kopuru handia da, eta neurri bereko Euskal Herriko eskualdeak konparatuz gero, gutxi izanen dira Bai Euskarari Ziurtagirien egitasmoak hainbertzeko eragina izan duten tokiak.
Azken 8 urte hauetan, Bai Euskarari Ziurtagiridunek mota guztietako konpromisoak hartu dituzte. Lorpenak aunitz izan dira, eta horiek agerian paratzeko 20 ziurtagiridunen azterketa egin dute. Arlo ezberdinak eta herri guztiak ordezkatuak dira. Guztira, 66 neurri edo ekintza mota aztertu dituzte. Langileen kontrataziotik eta auto eskoletako irakaskuntza materialetik hasi, eta dendetako diru kutxetako tiketetaraino. Aipagarrienak, irudi korporatiboa eta errotulazioa, fakturak eta ordainagiriak, lehen hitza, publizitatea, webgunea, administrazioarekiko harremana, programa informatikoak, lan bilerak, lan kontratuak eta nominak edo argitalpenak izan dira.
Guztira 226 konpromiso edo lorpen neurtu dituzte (gogoan izan 20 ziurtagiridunei dagokiela egindako azterketak).
Bortzirietan euskarari buruzko gogoeta prozesua ere egin berri dute. Aldez aurretik egindako elkarrizketetan bazen kezka bat; Bai Euskarari egitasmoaren emaitzak ez direla behar bezala neurtzen eta ikusarazten.
Gogoetaren emaitzetan, merkataritza, ostalaritza eta zerbitzu mundua euskalduntzeko helburu edo ildo estrategikoaren baitan, Bai Euskarari Ziurtagiriaren gaia kokatu da. Orokorrean, ziurtagiria dutenen lidergoa landu beharra azpimarratu da. Eta, zehazki, beharrezkoa dela gaur egungo planteamendua berrikustea, eta ziurtagiriaren gaineko gogoeta egitea eta berraktibatzea. Orain urtean behin egiten den segimenduaz harago, urtean zeharreko lan iraunkorra egin beharko litzateke. Horrez gain, Bai Euskarari Ziurtagiria indartu eta jendartera zabaltzea premiazkotzat jo da.
DIRU LAGUNTZAK
Euskara mankomunitateak diru laguntza ematen die Bai Euskarari Ziurtagiria eskuratu duten entitate eta eragileei. Egunotan, gutuna jasoko dute argibideak ematen. Eskaera egiteko epea uztailaren 1etik irailaren 30a arte egonen da zabalik. Eskaera orriarekin batera faktura, ordaindu izanaren agiria eta IFZ aurkeztu beharko dira. Aurtengo kopurua honako hau izanen da: 42,50 euro (ziurtagiriaren oinarrizko prezioaren % 50). Informazio guztia ikusgai dago mankomunitatearen webgunean, www.bortziriak.org helbidean.