Ekainaren 17tik 22ra Lesakako Ernaiko kideek komunikazio astea antolatu zuten. Izan ere, gazte mugimendua indartsu egoteko, komunikazioak garrantzia handia duela eta, honen hainbat arlotan sakondu nahi izan dute. Astelehenean serigrafia tailerra egin zuten Malerrekako gazte asanbladako bi kideren eskutik. Asteartean berriz, irrati tailerra egin zuten Xorroxinen. Asteazkenean bideoak egiteko ikastaroa egin zuten eta ortzegunean kartelak egiten ikastekoa. Ortziralean berriz, mahai ingurua izan zuten Arranon. Lehenik Gazte Oihuaren aurkezpena egin zuten. Izan ere, orain arte ttipi-ttapa aldizkarian ia urte batez gazteek argitaratutako orria izan da gazte oihua, baina proiektu hau zabaltzeko asmoa erakutsi dute gazteek. Hala, udan zehar eskualdeko herrietan barrena eztabaida prozesu bat zabalduko dutela jakinarazi dute, gazteek nolako komunikazio proiektua behar eta nahi duten azaleratzeko.
Honen ondotik mahai ingurua izan zen "komunikazioa gazte mugimenduan" izenpean Topatu.info webguneko Iraitz Salegi eta Gotzon Elizbururekin. Hauek komunikazioaren garrantzia azpimarratu eta eraginkorrak izateko hainbat aholku eman zituzten.
Azkenik, larunbat goizean igerilekuko paretan mural bat margotu zuten.
Gogotsu gelditu dira Lesakako gazteak, eta gazteriari "antolatu eta komunikatzeko aldarria" zabaldu nahi izan diete.