Emakumeen aurkako indarkeria kasuak saihesteko kontzientziazio kanpaina egiteko eta erasoren bat gertatuko balitz salatzeko eta informazio zuzena eskaintzeko lila puntua jarriko du Bortzirietako Gizarte Zerbitzuen Mankomunitateak, Berdintasun Alorraren bidez, Lesakako Sanferminetako asteburuan, ortziralean eta larunbatean.
Orain artean salaketarik izan ez arren, emakumeen aurkako eraso eta jarrera bortzitzak bizi izan dira azken urteotan Lesakako Sanferminetan, zehazki eraso saiakera bat eta drogen erabilera, hartzaileak kontzientzia galtzen du, erasotzaileak erraztasun guztiak izateko. Jokin Apezetxea, Mankomunitateko teknikariak ekainaren 14an egindako agerraldian aipatu duenez, «bai erasoa edo drogen erabilera, badirudi gure ingurutik kanpo gertatzen diren gertakizunak direla, baina Lesakako Sanferminetako asteburuan ere, masifikazioaren ondorioz, horrelako esperientziak bizitu direla jakinarazi eta salatzeaz gain, etorkizunekoak Lila Puntuaren bidez ekidin nahi ditugu». Teknikariarekin batera, Bortzirietako udal ordezkariak eta Toki Ona institutuko irakaslea ere izan dira agerraldian.
Kanpaina honen barnean, kontzientziazio liburuxka bat ere banatuko da ttipi-ttaparekin batera Bortzirietako 2.500 etxetan. Sanferminetako standerako ere boluntarioak lortu nahi dituzte. Hortaz, ortziral edo larunbatean turnoa egin nahi dutenek 948 635036 telefonora deitu edo ssb@lesaka.net helbide elektronikora idatz dezakete. Xorroxin Irratiaren bidez 3 kuña ere grabatu dituzte, ostatuetan jarri eta kanten tartean kontzientziazio mezuak bidaltzeko: "Edozein erasori aintzin egiteko gai zera, ez izan beldurrik, erran ezetz"; "Ser plasta o baboso no es ligar, es agredir", eta "Kasu eman edalontziekin, deus bota ez diezazuten". Asteburuan ibiliko den bestabuseko tiketak ere lila puntua eramanen dute.
Kanpaina honen bitartez, mezua transmititu nahi zaie emakume nahiz gizasemeei. Gizonek jakin behar dute ezetza ezetza dela eta horrelako gertaerak ikusten dituztenean ezetz errateko ere animatu nahi dituzte. Emakumezkoei dagokienez, ezetz errateko eskubidea dutela gogoan izan behar dute eta jarrera aktiboa izatera animatu nahi dituzte.