Urtero egiten duen bezala San Ferminak baino lehen kontzertu bat prestatu du Udal Musika Bandak. Ekainaren 28an, ortziral arratseko 10:00etan izanen da LesaKAntuz emanaldia Eskol Ttikiko aparkalekuan. Euskal kantu zaharren kontzertu bat izanen da, gonbidatu ezberdinekin.
Bertzeak bertze, trikitilariak, soinulariak, txistulariak, Ezpelur gaiteroak, bertso eskola, Josune Makibar, Inma Albisua eta Xabier Barriola igoko dira oholtzara musika bandakoekin batera. Kontzertua eskaintzen den bitartean edaria salgai izanen da eta nahi izanez gero, bakoitzak bere afaria ere eraman dezake.
Sanferminen aitzineko asteburua
Ohikoa denez, Lesakako Sanferminen aitzineko asteburua girotzeko ekitaldi gehiago ere antolatuak daude. Larunbatean, 15:30ean Ilasmendiko tiro-eremuan plater tiro lehiaketa eginen da, Pagolleta Ehiza Elkarteak antolatuta. 16:00etan, berriz, Arkupe elkarteak antolatuta, haurren pilota erakustaldia eginen da udal pilotalekuan. Igandean, berriz, 17:30ean Baztan-Bidasoaldeko trikitixa txapelketa jokatuko da Plaza Zaharrean.