Eguraldiaren aitzakiarik ez dute izan eta giro ederrean joan dira Berako Altzateko bestak. Ortziral arratseko txupinazotik hasi eta igande arratsalderako dantzaldia bitarte, jende aunitz ibili da Berako auzoan eta hainbat ekitaldi izan ditu parte hartzeko. Ikusi argazkiak
Ortziraleko txupinazoaren inguruan pintxo-poteoa ere izan zen eta ondotik, suzko zezena.
Larunbateko ekitaldi nagusia, Altzateko karrika erdian egin zen auzo bazkaria izan zen. Ohiko taldeak prestatutako zikiroa dastatu zuten, barrikotetik sagardoa edanez. Arratsaldean emanaldia eskaini zuen Gure Txokoa dantza taldeak eta taloak prestatu zituen ikastolako gurasoen taldeak. Arratsean kontzertua izan zen.
Igandean gaztelu haizatuak izan zituzten ttikienek egun osoan, eta entzierro ttikian edo erraldoi eta buruhandiekin lasterka ibiltzeko aukera ere izan zuten, baita arratsaldeko bizikleta jokoetan ere.
Igande arratsaldean dantzarako aukera izan zen: ikastolako haurren eskutik hip-hop emanaldia eta Rebeka dantza taldearen ikuskizuna.. Hainbat eta hainbat dantzari aritu ziren plazan eta bertze hainbertze edo gehiago ikusten. Etxalarko Irune eta Itsaso Elizagoien ahizpen doinuekin dantzaldia ere izan zen. Aitzinetik, Larun Haizpe elkarteak bezeroen artean banatutako txartelekin Landetarako bidaiaren zozketa egin zen eta Arantxa Rekondo suertatu zen saridun.