Bortzirietako Bertso Eskolak eta Berako Kultur Batzordeak Bortzirietako Euskara Mankomunitatearekin batera antolatutako Baztan-Bidasoaldeko XXVI. Bertsopaper lehiaketako epaimahaiak saridunak jakitera eman ditu eta sariak banatu zituen maiatzaren 31n Berako Kultur Etxean egindako ekitaldian. Guztira 170 lan aurkeztu dira lehiaketara.
10 urte arteko partaideak biltzen zituen A mailan lehenbiziko saria (garaikurra eta 50 euro) Berako Ekhiñe Zapiain Arlegirentzat izan da, Ikastolan erdi lo lanagatik; bigarren saria (30 euro) Narbarteko Maddalen Oteiza Ollok eskuratu du Udaberria lanagatik. Aipamena ere egin dio epaimahaiak Iratxe Muxika Karrion lesakarraren Nere ametsa lanari.
11-14 urte artekoen B mailan, lehenbiziko saria Uxue Mesa Garmendia lesakarraren Oporra lanak jaso du (garaikurra eta 100 euro). Bigarren saria, Narbarteko Gaizka Agirre Urrozen Binakako finala lanak eskuratu du (70 euro). Kategoria honetan ere bi aipamen berezi egin ditu epaimahaiak, Berako Maiana Alzuguren Udaberria lanari eta Arantzako Jon Zabalaren Bertsolaritza lanari.
15-18 urte artekoen C mailan lehenbiziko saria Azkaineko Aitor Servier-Etchechuriren Metamorfora bertso-xortak jaso du (garaikurra eta 150 euro) eta bigarren saria (120 euro), Lesakako Ibon Txoperena Elosegiren Egun normal bat lanak.
18 urtetik goitikoen D mailan, azkenik, lehenbiziko saria (garaikurra eta 200 euro) Berako Julen Zelaieta Iriartek eskuratu du, Amets bizidunak lanarekin eta bigarren saria Lesakako Eneko Fernandez Maritxalarren Yes, we C.A.N. lanak eskuratu du (150 euro).
Sari banaketaren aizinetik eta ondotik, eskualdeko bertso-eskola ezberdinetako ikasleek beraien bertso antzeztuak eskaini zituzten oholtzan eta giro ederra izan zen Berako Kultur Etxean.