San Juan bezperarako ekitaldia antolatu du aurten ere Euskara Batzordeak, Lesaka euskararen arnasgune goiburupean. Euskara Batzordeak, «natura bezala, hizkuntza eta kultura ere babestu beharrak direla» erran nahi du lelo honekin eta nolabait, «euskara natural bizi dugu eta toki erdaldunentzat eredu gara».
Ekitaldiei dagokienez, 17:30ean plazatik abiatuta Lesakako mairu eta kristauen besta bisita gidatua eginen da Rafael Eneterreagarekin, txistulariek lagunduta. 18:30ean haurrentzako jolasak izanen dira eta 20:00etan ekitaldia. Haurrek Esne Beltzaren Euskaraz bizi nahi dut, abesbatzak Txomin Artolaren Aberriaren mugak eta denek batera Gaizka Sarasolaren Biziberrituz euskara kantatuko dute. 20:30ean sua piztuko da plazan. Euskara Batzordeak bi su piztuko ditu, bat haurrentzat eta plazako eremuan ezin izanen da su gehiago piztu. Dantzariek giroa jarriko dute eta afari berendua ere eskainiko da. 21:30etik aitzinera musika izanen da DJ Endararekin.