Lesakako Beti Gazte elkartearen eguna ospatuko da ekainaren 8an eta larunbat osoan hainbat ekitaldi izanen dira.
Goizeko 08:00etan mendi irteera eginen da Frainera. Lesakako aldetik igoko da eta gero Alan-Zaharren gosaldu ondotik, Otsangon barna plazara joanen dira mendizaleak. Hiru ordu inguruko ibilaldua osatuko dute.11:00etan berriz, bizikleta irteera eginen da, plazatik abiatuta Berrizauneraino trenbidetik eta buelta NA-1210 errepide zaharretik. Gero, ginkana eginen da 8 urtetik goitikoentzat.
Arratsaldean, 4:00etatik 5:00etara benjaminen eta emakumezkoen futbol-7 partidak jokatuko dira. 5:00etatik 7:00etara futbol-7 partidek segituko dute, Beti Gazteko jokalarien artean. Arratseko 8:00etan txaranga ibiliko da karrikaz karrika eta 9:30ean afaria izanen da Kasinon. Afarirako txartelak Koxkila ostatuan daude salgai 25 euroan eta izena emateko azken eguna ekainaren 6a izanen da.