Urruti zegoela bazirudien ere, hilabete bat baino guttiago gelditzen da eskolako ehungarren urteurreneko besta ailegatzeko. Ekainaren 8rako prestaketa lanak aitzineratzen ari dira eta egitaraua ia lotua dago.
Goizean, 10:30ean, eskolatik altxaferoa botako da. Ondotik, Aitor Elexpuru zuzendariaren ongietorri hitzak aditutakoan, logo berriaren aurkezpena eta ekitaldi instituzionala izanen dira. Segidan, haurrek bertso batzuk botako dituzte eta eskolako gimnasioan ikusgai egonen den erakusketako ateak zabalduko dira. Aipatu beharra dago erakusketa hau egiteko materiala biltzen ari direla eta gisa berean, egun horretan 12:00etan itxiko bada ere, bertze egun batzuetan berriz ere ikusgai paratuko dela.
Egunarekin segituz, 11:00etan trikitilariekin kalejira izanen da eta 12:00etan plazan dantzarien emanaldiak izanen dira. Bukaeran, herriko dantzak dantzatuko dira eta ahalik eta lagun gehienek parte hartzeko eskatu da.
Bertsolarien txanda ere izanen da, tartean, Sebastian Lizaso bera.
14:00etan bazkaria frontoian eginen da. Bazkarirako txartelak salgai daude ostatuetan: helduek 32 euro; 8-14 urte artekoek 15 euro; eta 3-7 urte artekoek 10 euro ordaindu beharko dute.
Bazkalondoan, bertsolariak ariko dira. Eskolari buruzko proiekzio bat eman ondotik, herriko akordeiolari, trikitilari eta kantariek beuren saioa eginen dute. Oraindik ez dago zehaztua puzgarriak izanen ote diren.
20:00etan batukada izanen da eta afaltzeko, bokadilo jatea eginen da frontoian. Egunari akabera emateko, leku berean, dantzaldia Agerralderen eskutik izanen da. Txozna ere paratuko dute.