Zagok bosgarren aldiz irabazi du Berako Mendi Maratoi Erdia

Biarnoko Didier Zago, 1:40:48ko denborarekin eta Oihana Kortazar 2:02:43koarekin garaile izan ziren apirilaren 14an Beran jokatu zen Berako IX mendi maratoi erdian. Zago arazorik gabe nagusitu zitzaien gibeletik zituen Oier Ariznabarreta eta Aritz Egeari, Larun gainetik igarotzen zen 21 kilometroko ibilbide gogorrean.

Aurtengoan ezin izan zuen Zagok bere denborarik hoberena egin, 2011n egindako 1:38:11tik urrun ibili da. «Bero handia egiten zuen eta ezinezkoa izan da eta mendian haize aunitz zebilen» aipatu zuen Biarnoko korrikalariak Berako lasterketa bosgarren aldiz segidan irabazi ondotik. Ibardineko tarteko helmugako saria, ordea, eskuratu zuen.

Emakumezkoetan, Elgetako Oihana Kortazar izan zen lehena eta markarik onena ezarri zuen, aitzinekoa kasik 2 minututan hobetuz (2:02:43). «Niri beroak mesede egiten dit, ura edanez moldatzen da hori», zioen gustura emakume irabazleak, errekor berria egin eta gero. Aitziber Ibarbia zizurkildarra bigarren izan zen (2:04:35) eta Izaskun Zubizarreta donostiarra hirugarren (2:07:10).

500tik goiti izan ziren parteartzaileak eta hauetatik 484 iritsi ziren helmugara, Nafarroako koparen lehen froga zen maratoi erdi honetan. Jende aunitz hurbildu zen karrera ikustera, eguraldi ederra lagun.