Bertze urte batez Nafarroako Skeet Olinpiko txapelketa irabazi du Itsaso Fagoaga lesakarrak. Txapelketaren lehenbiziko zatia Elizondon jokatu zen martxoan eta bigarrena apirilaren 20an Valdorban. Itsaso txapeldun izan zen eta Antonio Javier Fagoaga aita azpitxapeldun.
Aitzinetik, Espainiako Erregearen Kopa ere irabazi zuen apirilaren 6 eta 7an Pinton (Madril). Skeet Olinpikoko nazioarteko txapelketetan izaten ziren emaitza bikainak ikusirik, modalitatea zailtzeko aldaketa batzuk egin dituzte eta oraindik ere adaptazio prozesuan dabiltza tiralariak. Horregatik eta haize zakarrarengatik, ez zituen emaitza onegiak lortu, baina halere txapeldun izatea lortu zuen Itsaso Fagoagak. Lesakako tiralariak aipatu digunez, «pozik nago egindako emaitzarekin, aldaketak eman direnetik lehenengo txapelketa izan delako».
Orain entrenatzen segituko du, maiatzaren 11 eta 12ko asteburuan Espainiako txapelketa jokoan izanen baitu Granadan. Lan kontuak medio, heldu den urtean Ingalaterrara joanen da bizitzera Itsaso Fagoaga, baina txapelketekin segitzeko intentzioa du: «Eskopeta harat eramango dut bertan entrenatzeko eta txapelketetarako etorriko naiz», dio.