Aitzineko alean aipatu bezala, herri eskolak 100 urte bete ditu aurten. Eskolako irakaslegoa eta guraso elkartea, udala, Ekaitza elkartea eta Gazte Asanblada elkarlanean ekainaren 8rako egitaraua prestatzen ari dira. Egitarauaren barnean, maiatz akaberan erakusketa eginen da eskolan.Eskolarekin zerikusia duten materialak ikusgai izanen dira: argazkiak, liburuak, koadernoak, lanak, eskolako materiala… beti ere, 100 urteko ibilbidearen laburpentxo bat atonduko dute. Hori horrela, egitasmo hau gauzatu ahal izateko, herritarren laguntza ezinbertzekoa da. Hortaz, etxeko edozein xokotan, ganbaran… erdi ahaztuak diren material eta dokumentuak eskolara ekartzeko deia egin dute, erakusketa osatzen joateko. Ekimen honen bitartez, zokoratuak diren materialei bizia eman eta garai bateko kontuak oroitzeko baliagarri izanen dira. Beraz, eskolarekin lotura duen edozein elementu bertara eramateko gonbidapena egin da.
Egitarauko zenbait ekitaldi aintzinatzeko, dantzariak, herri kirolak, bertsolariak, herri bazkaria eta proiekzio bat ere aurkeztuko da. Aldizkari bat osatzeko lanean ere ari dira.
Bien bitartean, eguneko ekitaldiak lotzeko bileratan ari dira eta joan den ortziralean antolatzaileak biltzekoak ziren.