Nafarroako Soinularien Eguna ospatuko da apirilaren 21ean herrian. Igande eguerdian kalejiran ibiliko dira Nafarroa osotik etorritako akordeolariak. Gero, Linddurrenbordan bazkalduko dute eta bazkal ondoan ere akordeoi doinuak izanen dira.
Xalbador Madariaga, herriko akordeolari taldeko zuzendariak aipatu digunez, aurtengoan hirugarren edizioa beteko du Nafarroako Soinularien Egunak: «Duela bi urte Amaiurren bildu ginen bazkaltzera 30 bat lagun eta iaz Eugin 64 izan ginen, egitarau zabalagoarekin. Aurten Lesakan ehun soinularitik goiti elkartuko gara». Gaur egun 22 akordeolari biltzen dira herriko taldean eta 30. urteurreneko ekitaldia ere prestatzen ari dira maiatzaren 25erako. Hiru hamarkadako ibilbide horretan, 1992an eta 1993an nazioarteko sari garrantzitsuak irabazi zituen Parisen eta Italiako bertze lehiaketa batean bosgarren postua ere eskuratu zuen. 2008an, 25. urteurrena ospatzen zuen urtean, Sanferminetako txupinazoa botatzeko ohorea ere izan zuen Madariagak, akordeolari taldearen izenean.