Euskara Batzordeak antolatuta Udaberriko bestak ospatuko dira apirilaren 27 eta 28ko asteburuan eta maiatzaren 1ean, asteazkenarekin.
Apirilaren 27an, larunbat goizeko 10:00etan ibilaldi gidatua eginen da Berrizaunera, plazatik abiatuta. 16:00etan haurrentzako jokoak eta berendua izanen dira plazan eta 20:00etan Mugaldekoak filma eskainiko da eskolan.
LAUGARREN MERKATUA
Apirilaren 28an, igandearekin, 11:00etatik 18:00etara plazan eginen den merkatua izanen da udaberriko bestetako ekitaldi nagusia. 2007an Igantziko Euskara Batzordea merkatua antolatzen hasi zen. Helburua zen herritarrek emandako gauzekin merkatua antolatzea eta hortik ateratako diruarekin herrirako proiektu bat aitzinera atera ahal izatea. Errate baterako, lehen edizio hartan bildutako diruarekin herriko mapa egin zen. Geroztik merkatua bi urtetik behin egin izan da, eta aurtengoa laugarrena izanen da.
Aurten, merkatuan bilduko den dirua herriko gida berritzeko eta etxeei beren izenekin errotuluak paratzeko erabiliko du Euskara Batzordeak. Bertan salgai izanen dira herritarrek emandako etxeko puskak (barazkiak, landareak, arraultzeak, mermeladak, kontserbak, postreak, eltzaurrak...) nahiz bigarren eskuko tresnak (CDak, DVDak, ipuinak, liburuak, jostailuak, apaingarriak, bitxiak, boltsoak...), guztiak prezio ezin hobean. Euskara Batzordeak informazioa banatu du etxeetara, eta puskak eman nahi dituenak apirilaren 20rako harremanetan jarri behar du batzordeko kideren batekin.
Horrez gain, herriko bi ostatuek bi lagunentzako otorduak eskaini dituzte, eta horiek azken orduan zozketatuko dira. Zozketarako boletoak egun osoan salgai izanen dira merkatuan bertan. Arratsaldez opilak izanen dira, eta herriko trikitilarien saioa ere izanen da.
Udaberriko bestak borobiltzeko, maiatzaren 1ean, asteazken eguerdian Igantzi kantari saioa eginen da karriketan barna eta pintxo-potea eskainiko da Allinean eta Herriko Etxeko ostatuan.