Korrikak edizio bakoitzean, pertsona edo erakunde bat omentzen du. 18. edizio honetan, euskalduntzen eta alfabetatzen ari diren milaka pertsona hartu dituzte gogoan. Martxoaren 14tik 24ra bitartera egiten den kilometro bakoitza haiei zuzendua dago, baina horretaz gain, omenaldi bereziak ere antolatu dituzte han hemenka. Hain zuzen, martxoaren 16an, larunbatean, Bortzirietako euskara ikasleen omenaldia antolatu dute. Arratsaldeko 06:00etan plazatik abiatuta, Bortzirietako Korrika, Korrika sinbolikoa izanen da. Korrika ofiziala iritsi baino egun bat lehenago, Korrika giroak hartuko du herria. Bortz lekuko aldaketa eginen dituzte bortzirietako ikasleek, herri bakoitzeko lekuko aldaketa bat.
18:30ean berriz, ekitaldia nagusia hasiko da. Hasteko, Tantirumairu euskal folklore taldekoek aurreskua dantzatuko diete euskara ikasleei eta Lesakako Trikipand taldeko trikitilariek osatuko dute arratseko musika pieza. Horretaz gain, euskaltegiko ikasle eta irakasleek zerbait irakurri eta abestuko dute eta Maddalen Lopez eta Ioar Taintak bertsoak kantatuko dituzte. Arratsalde osoan zehar, Labiaga ikastolako talogileek taloak prestatuko dituzte.