Martxoaren 17an ailegatuko da Korrika herrora, baina bezperan, Korrika giroa nagusituko da herrian. Bortzirietako euskara ikasleak omenduko dituzte martxoaren 16an. Ekimen honekin, gure hizkuntza xaharra ikasteko egiten duten ahalegina eskertu nahi zaie. Arratsaldeko 06:00etan plazatik abiatuta, Bortzirietako Korrika, Korrika sinbolikoa izanen da. Bortz lekuko aldaketa eginen dituzte, Bortzirietako ikasleek, herri bakoitzeko lekuko aldaketa bat. 18:30ean berriz, ekitaldia nagusia hasiko da. Hasteko, Tantirumairu euskal folklore taldekoek aurreskua dantzatuko diete euskara ikasleei eta Trikipand taldekoek osatuko dute arratseko musika pieza. Horretaz gain, euskaltegiko ikasle eta irakasleek zerbait irakurri eta abestuko dute eta Maddalen Lopez eta Ioar Taintak bertsoak kantatuko dituzte. Arratsalde osoan zehar, Labiaga ikastolako talogileek taloak prestatuko dituzte.