2.492.108 euroko diru sarrera eta irteerak izanen ditu aurten udalak, Bilduren aldeko botuekin onartutako aurrekontuaren arabera. Andra Mari Zahar Etxearen aurrekontua, berriz, 694.000 eurokoa izanen da. Bietan ere, aurrekontu ttikixeagoa dute. Azkeneko urteetan bezala, udalaren zorra kontuan hartuz, guttieneko aurrekontu bat izanen da, eta inbertsio gutti eginen da. Amortizazio eta interesetan bakarrik aurrekontuaren %14 joanen da, 360.000 euro eta krediturik eskatzeko aukerarik ez du Herriko Etxeak, udalaren zorpetze maila %200 ingurukoa baita eta kredituak eskatu ahal izateko muga %75ean dago. Halere, gastu soziala eta zerbitzuak mantendu nahi izan ditu Bilduko udal taldeak.
PNVk ez zuen bozketan parte hartu. Beraiek aztertzeko eskuratu zuten oinarrizko aurrekontu-zirriborroak eta dokumentu ofizialak zerikusirik ez dutela salatu zuten. Gainera, hainbat atal murrizten direnean, udalak Euskara Mankomunitateari ematen dion diru kopurua bi urtetan bikoiztu izana ez zuen ulertzen PNVk, eta ez zuen beharrezkoa ikusten Lesaka UEMAn eta Udalbiltzan egotea. Aurrekontuko bertze puntu batzuekin ere ez zegoen konforme PNVko udal taldea.