Udalak hainbat ekitaldi antolatu zituen martxo hasieran, Espainiako Gerran fusilatutakoak eta desagertutakoak gogora ekartzeko. Ekitaldi nagusia martxoaren 3an egin zen.
Goizean lore eskaintza egin zen hilerrian, eta bertako hobian paratu den harria agerian utzi zen. Hauxe irakur daiteke hilarrian: Berako Udalak Espainiako gudan fusilatutakoak eta desagertuak gogoan; Gazte ziren, aske ziren, langile ziren eta harro zeuden, gizarte berri bat amesten zuten eta berdintasunean sinesten zuten.
Eguerdian, Beran fusilatu zituztenez gain, fusilatutako eta desagertutako beratarrak omendu zituen Udalak Herriko Etxeko plazan. Hamabi beratar identifikatu dituzte fusilatu eta desagertutakoen artean: Secundino Anadon Cambero, Francisco Arozamena Irazoki, Lucio Aldai Longarai, Ramon Balza Loperena, Enrique Berasain Sorondo, Juan Etxenike Matxiarena, Gregorio Francisco Garbisu Endara, Ecequiel Gomez Rodrigo, Esteban Irazabal Irazabal, Joxe Larraburu Maritxalar, Faustino Martinez Urteaga eta Cesareo Seminario Iraizoz. Musikari, bertsolari eta dantzarien saioen artean, adierazpen instituzionala irakurri zuen Marisol Taberna alkateak, Asteasu, Etxalar, Igantzi, Tolosa, Villabona, Zizurkil eta Berako udal ordezkariak inguruan zituela. «Sufrimendua, krudelkeria, gerraren oinazea ahantzi gabe, berriro ere gerta ez dadin, adiskidetzearen aldeko mezua zabaldu nahi dugu gaur, hemen. Gorrotorik gabeko gizartea eraikitzeko konpromisoa hartzen dugu, askatasunean, justizian eta aukera berdintasunean oinarritua egonen dena. Ez Euskal Herrian, ez munduko bertze inongo lurraldetan horrelakorik berriz ere gerta ez dadin, gure ahotsa goratzen segituko dugu, herrien eta pertsonen askatasunen alde», zioen idatziaren bukaerak.
Erantzuteko, izena emanda egon behar duzu eta horretarako baimenak eduki behar dituzu. Sartu komunitatera!